25 de Mayu

El 25 de mayu de 1808, la Xunta Xeneral del Principáu, aconceyada na
sala capitular de la Catedral d'Uviéu y presidida pol somedán Álvaro
Florez Estrada, decidió proclamase soberana, llevantándose a la
contra del poder central, enclicáu a los invasores franceses.
Asturies, nún de los momentos de la so historia en que tuvo un papel
claramente protagonista, unvió embaxadores a Inglaterra y declaró-y
la guerra a Napoleón, que dominaba naquel tiempu cuasimente tol
continente Européu y contra'l qu'Asturies entamó un exércitu propiu
con milicia regular y con un reximientu popular conocíu como
"L'alarma" al que s'apuntaron voluntarios d'ente 15 y 60 años que nun
taben llamaos a files.Amás de ser parte activa nel llevantamientu
contra Napoleón, el pronunciamientu del 25 de mayu dio llugar al
nacimientu del símbolu identitariu asturianu, la bandera del país,
que diseñó l'ilustráu Xovellanos y que la Xunta Xeneral aceptó
faciéndo-y dellos cambeos menores.Anque los sos oríxenes yá apaecen
nel sieglu XIV cola creación del títulu de Principáu d'Asturies, la
primer noticia oficial que se tien de la Xunta Xeneral ye del añu
1444. La Xunta funcionaba como un parlamentu foral con cerca de 40
miembros qu'aconceyaben como mínimu cada tres años, nomando nos
periodos intermedios una Diputación Xeneral que funcionaba como
gobiernu autónomu y que presidía un Procurador Xeneral. Nella teníen
escañu los representantes de les families más importantes de los
conceyos asturianos, y, anque nun tenía atribuciones llexislatives,
sí tenía una importante autonomía fiscal y de xestión, siendo
órganu qu'intermediaba ente la Corona y Asturies.Llama l'atención el
fechu de que dempués del so momentu de mayor protagonismu, col
llevantamientu contra Francia, la Xunta Xeneral siguiere una
trayectoria decadente como institución, desapaeciendo nel añu 1834 y
sustituyéndola la Diputación Provincial. Ello ye que, nel tiempu de
Fernando VII, la Xunta Xeneral representaba una institución poco
amañosa lo mesmo pa lliberales que p'absolutistes. Mientres qu'unos
defendíen un estáu centralista a la francesa, los segundos víen
nella una institución con ciertes formes democrátiques y que naquel
momentu taba tomada polos lliberales. Con ella desapaeció lo que
quedaba d'autogobiernu n'Asturies.La fecha del 25 de mayu pasó asina a
la historia como ún de los momentos decisivos na creación de la
identidá d'Asturies, amestándose nel inconsciente popular como un
momentu trescendente equivalente n'importancia al reinu asturianu o a
la revolución de 1934. En llegando la transición a la democracia a
últimos de los años 70, l'asturianismu políticu y cultural propunxo
la fecha del 25 de mayu como día oficial de la comunidá autónoma,
pero a la fin la restituyida Xunta Xeneral decidióse pola celebración
relixosa del 8 de setiembre, día de la Virxe de Cuadonga.

.